Fyrir kennara

Þessi áfangi varar ekki bara við gervigreind. Hann þjálfar dómgreind, með endurtakanlegri aðferð sem þú getur keyrt í hvaða grein sem er.

Hvers vegna hann er öðruvísi

• Hann nefnir raunverulegu hættuna: iðkunarskuld. Að láta vélina taka æfinguna þína er lán sem safnar vöxtum, getan situr ekki í nemandanum. Áfanginn er byggður til að koma í veg fyrir það.
• Hvert verkefni byrjar á nemandanum sjálfum (Mannlega akkerið), lætur svo vélina magna það, og endar á ábyrgð (Ábyrgðarskjalið). Nemandinn kemst ekki í gegn með kvaðningu einni saman.
• Sama þriggja skrefa hryggjargrind í öllum 21 einingunni. Þú lærir eina, þú kannt þær allar. (Eining merkir hér námshluta, ekki framhaldsskólaeiningu.)
• Styrkt af Þróunarsjóði námsgagna (Rannís) og frjálst til notkunar (CC BY-SA 4.0).

Hæfnilínurnar fjórar

Hver eining er merkt einni af fjórum hæfnilínum. Þetta er innra flokkunarkerfi verkefnisins, kortið fyrir kennarann á bak við nemenda-yfirborðið. Hæfniviðmiðin sjálf, í skilningi aðalnámskrár, eru í sérstöku skjali sem tengt er hér að neðan.

• ◆Undirlagsdómgreind

  Að greina hvar úttak gervigreindar er traust, hvar það er brothætt og hvenær þarf frumheimildir eða mannlega reynslu.

• →Stefnufesta

  Að halda eigin markmiði í stað þess að láta tólið stýra verkefninu að næsta þægilega svari.

• ◎Samvinnuathöfn

  Að nota gervigreind sem vinnufélaga, ekki staðgengil. Framselja, yfirfara, hafna, leiðrétta og bera ábyrgð.

• △Jaðarlæsi

  Að æfa sig í að vinna þar sem hvorki kennari né nemandi hefur fullkomið svar fyrir fram.

Aðalnámskrá: hæfniviðmið, lykilhæfni og þrep

Áfanginn er þýddur yfir á mál aðalnámskrár framhaldsskóla: tíu hæfniviðmið, kortlagning á níu sviðum lykilhæfni, þrepasetning og rök fyrir því að þriggja skrefa aðferðin sé leiðsagnarmat. Þar er líka reiknigrunnur fyrir f-einingar.

• Tíu hæfniviðmið á formi aðalnámskrár, sameiginleg öllum einingunum, því allar fylgja sömu hryggjargrind. Kennari sem hefur metið eina kann að meta þær allar.
• Kjarninn liggur í þremur sviðum lykilhæfni: læsi, tjáningu og samskiptum um tölur og upplýsingar; námshæfni; og skapandi hugsun og hagnýtingu þekkingar. Sex svið til viðbótar koma við sögu eftir einingum.
• Efnið er hannað fyrir þrep 2. Grunnlögin standa á þrepi 1 og gera engar forkröfur. Einingar 05, 09 og 20 má keyra á þrepi 3.
• Þriggja skrefa aðferðin er leiðsagnarmat: ferlið er metið en ekki afurðin, og hæsta einkunn fæst fyrir rökstudda höfnun en ekki fyrir glansandi skjal.
• Full útlistun hæfniviðmiða og lykilhæfni, ásamt reiknigrunni fyrir feiningar, fylgir kennaraefninu sem sérstakt skjal.

Hvernig á að keyra hann

Byrjaðu á grunnlögunum, veldu svo einingar eftir áhuga bekkjarins. Hver eining er sjálfstæð, tekur eina til tvær kennslustundir, og fylgir sömu þremur skrefum. Nemendur mega nota hvaða gervigreindartól sem er; ókeypis aðgangur dugar og ekkert verkefni krefst persónuupplýsinga.

• Skref 1, Mannlega akkerið, á að gerast ÁN vélar. Efnið segir það sjálft: „Þetta skref byrjar ekki við lyklaborðið.“ Í kennslustund er einfaldast að leggja það fyrir á pappír eða láta setja tölvur í flugstillingu.
• Æfingin þarf engan aðgang að gervigreind. Svarið sem nemandinn gagnrýnir er fyrirfram tilbúið, svo ein vél dugar á tvo nemendur. Fullyrðingarnar standa í síðunni þótt slökkt sé á JavaScript, svo óútfyllt æfing prentast sem vinnublað.
• Aðeins skref 2, Vélræna uppbrotið, krefst vélar í raun. Skref 3 þarf tæki til að skrá, ekkert annað.
• Raunhæf tímaskipting í 40 mínútna stund: 5 til kynningar, 20 til 25 í akkerið á pappír, 10 í að lesa upp og bera saman. Full keyrsla þriggja skrefa tekur tvær stundir.
• 1.000 orða krafan í akkerinu er heimavinna en ekki tímaverk. Efnið leyfir styttri prófunarútgáfu og 150 til 250 orð duga í tíma.